3歲

不一樣的味道

未返學前,我幾乎日日同仔仔都黎呢度食。有時食早餐,大多數時間食晏。唔係因為好食,而係地方大,唔駛搵位,坐得舒服。見你推住架車仲會拎埋畀你,過程中我食得舒服啲。 自然醒之後,我會即刻煮落飯,梳理好自己後就放阿仔落車,兩個人就落後解決我嘅午餐,之後再返屋企食佢餐飯。事關我朝頭早一定要食左野先有energy,otherwise我會燥底,思想唔集中,冇耐性⋯⋯不過就算我食埋晏都唔係好晏嘅。 食完佢餐晏仔,我地會喺屋企玩一陣,又或者去公園玩。不過我自己係外向嘅人,鍾意出去玩,所以幾乎日日落公園玩,玩到覺得日日去同一個公園好悶。玩完公園後又會同佢去停車場門口睇車車。 可能係男仔,佢好鍾意車。我同佢就坐喺二座座頭大堂梳化,睇住啲車由條路轉入黎,再分流入停車場,有啲轉入屋苑入面。我從來唔覺得「睇車」係一個節目,但佢好鍾意,可以企喺度睇成三四個字都唔願走。佢會指住轉入黎果架車係的士,出去果架係私家車,有黑色、紅色、黃色⋯⋯。見佢咁投入,我又一齊睇,不知不覺我都好enjoy同佢一齊探索認識世界嘅過程,我mau喺佢隔離,佢又跟我mau。人地話囡囡係老公前世女友,我就肯定仔仔係我前世男友。因為佢淨係企喺我隔離,我已經好lum,好幸福同好開心。 要返屋企佢唔肯走,我地就會數十架車車,睇完十架車車之黎就要走。之後佢又會扭計要睇多五架,睇完後就被我拉住走,但起碼佢會順攤啲,可能佢覺得自己已經攞左著數。 返到屋企就暗佢訓,佢訓左我煮飯,入夜老公返到黎~~~每一日嘅生活都係咁過。曾經覺得好悶,但時間飛逝,小朋友一返學,曾經以為理所當然嘅,又再一次成為好似唔存在過嘅回憶。 呢啲點滴就只有我知道。 今日阿仔喺奶奶度,再黎呢度食返同一道甜酸排骨,但味道已經唔一樣了 :)

kindergarten

返學適應期

由星期一開始,小朋友返學就喊啦。 第一日係過馬路就喊,第二日係入門口就喊,第三日,即係今日未過馬路已經喊。一見佢喊,我就有啲唔捨得,但學校都好好,校長仲同我傾左陣關於小朋友適應嘅問題。 放學時小朋友見到我梗開心,但佢嘅行為又開始似bb令我好煩惱。遇到小小野唔順意就扭計投訴,搞到我心都煩埋。 過左一星期半左右,小朋友開始適應了,返學冇再扭計同喊,食飯都食快左。以為漸入佳境時,就突然傷風病了,而且仲發燒,理所當然同學校請假。因為病情較反覆,剛剛又遇上兩日學校假期,於是小朋友無端端放左成個星期假。佢病癒嘅周末學校舉行嘉年華,同爸爸帶佢返去玩,佢又表現ok喎,玩得投入同開心,諗住星期一無風無浪正常返學。 唉,點解又開始含飯嘅?佢仲問我係咪返學,我一話係,佢就咳幾聲話自己咳咳唔返學啦{(-_-)}~~~ 幾經辛苦拖到佢返學,一去到門口又放聲大哭啦,佢入左學校我仲聽到佢把喊聲(T ^ T)陰公。同門口老師傾左幾句,佢贈我:「你預左從頭黎過啦!」「唔係阿馬?遲下放聖誕假新年假又黎過呀?」(; ̄O ̄)我驚訝地問。「農曆年會好少少啦,到時又大少少⋯⋯」老師答。 農曆年⋯⋯二月?到時先好少少呀!?(驚,泣)  

kindergarten

K1唔寫字

而家小朋友返學真係唔簡單。 三歲人仔都未夠就要返學,K1就要揸筆。唔係話唔主張小朋友太細個,手仔唔適宜揸筆架咩?外國仲話唔興flash card,因為認到果個字唔代表識用果個字。 我以為返K1就係學下自理,唱下歌仔玩下遊戲,每日喺學校學下唔同生仔字,我要求唔多,只求佢返得開心,如果學校能夠善用孩子好奇心,引發佢地願意主動學習,咁就喜出望外⋯⋯。顯然我對今時今日嘅幼兒教育脫曬節,仔仔返K1竟然有功課!係,我一直認為K1係唔會有功課的,返左兩三個禮拜,學校同家長開個家長會,功課就開始每天接踵而來。雖然功課只係畫線,油下顏色咁,但對我個小朋友黎講,原來確係困難。 執筆寫字對我來說從來不是難事,坦言我還挺喜歡寫字的。我寫嘅字算唔差架,細細個都成日聽到人地讚我字令,愈寫愈開心,於是又愈寫愈好。我以為與生俱來嘅野,喺另一個人身上竟然變得係斐異所思,要刻意追求的東西。 當然我個仔唔會刻意追求寫字,刻意唔寫字就有佢份。