3歲 · 玩玩玩 · 去街街

愉景灣 Discovery Bay

上星期突然紅雨,搞到全香港唔駛返學,之後成個禮拜變得離奇通爽,日頭我唔開冷氣都仲得! 我地趁周日出左去愉景灣行下。本來老公想影相,但時間晏左少少,去到已係黃昏,我地只係去左個沙灘就算。 出發前阿仔好興奮,係咁話好野,有得去沙灘!仲前叮萬囑我地帶堆沙工具。沿途佢都好興奮,成日擒上擒落。唯有同佢玩下個APP,等佢可以坐定少少,唔好影響人。坐船過去佢又好開心,我坐佢後面同佢一齊睇風景,同佢傾下計,「呢個係貨船,呢個係浮標」等等,我同佢都好開心。   天氣好好。原意係鋪張沙灘蓆喺度,跟住佢自己由發揮……   出乎意料,小朋友去到沙灘唔肯落地。其實佢都唔係第一次去,爸爸一直拖住佢隻手仔行,佢就喺後面縮縮下咁,我見佢D手指都屈曬起黎。佢好唔習慣喺沙上面行果種感覺,一直大吵大嚷要大人抱起佢。 小朋友全程唔肯落地。佢爸爸好失望,原本以為會同佢好開心咁喺沙灘追逐,但阿仔反應完全係另一樣野——驚驚青青捉實大人要抱。後來我地帶佢去公園玩下,諗住有個熟識D嘅環境,可能可以令佢放鬆一下。但小朋友好似regressed左咁,d馬騮架佢唔肯爬,滑梯都唔係好有興趣。佢老豆好失望,跟住就企喺佢隔離ON居居咁,已經唔想同佢玩了。 呢種情況都唔係第一次。 小朋友比較怕生,去到陌生環境,好容易蛇kuare。同佢去新地方,要畀多d耐性佢。呢樣野佢老豆成日都唔記得左。 後來佢終於肯落草蓆玩,但係都係唔肯落沙地。我專登放d玩具遠少少等佢離開「安全區」,都唔係好work。唯一一次係要玩倒水倒泥,佢即刻二話不說標出去推開個桶,之後又縮返去張蓆度。   佢老豆超灰,全程發呆。   之後我地出返中環,坐叮叮去cwb食野。小朋友開心曬,佢好鍾意坐叮叮,明明抱住都要落地行去電車站。 今日返學畫交通工具,小朋友揀左電車。 原來佢咁鍾意電車,我而家先知。

3歲 · 去街街

油街實現

母親節,我地冇咩特別節目。 做全職媽媽,對我黎講日日都係母親節。 天氣一般,就去左近近地嘅北角行下。 油街實現其實係油街十二(號)嘅諧音。同牛棚幾似,都係古舊建築物改裝,變成發表藝術作品用途。地方勁易搵,炮台山地鐵站出,過對面馬路,一直行向右過條馬路仔已經係,五分鐘都唔駛。 記得以前每日坐108返工,日日都會經過呢度的。 地方唔大。地下有兩個小展館,上面係寫字樓。近門口有一間好細,類似coffee shop但唔係coffee shop的東西。前面有個花園叫「白做園」。   入面有個鐘,阿仔超鐘意,勁敲冇停手。   展館一號題材係「買樓」。   自稱小車迷嘅小朋友睇睇下展品,突然大叫﹕「咦﹖有Henry喎!」 玩具呢家野,真係逃唔過小朋友法眼的。   我知…展品有張床,咪扮野玩下咯~~~   呢個幾好玩。喺塊水松板上面畫幾條線,再用其他物料整幾架車,小朋友就喺度停車泊車玩左好耐。   阿媽成日叫我去廁所唔好睇書,話唔尊重d字喎。我明白佢意思,但唔知佢呢個理念點黎。睇到呢個,我估以前上一代嘅人普遍都有呢個想法。展品仲要參觀者試下跪喺度寫字,字,係要尊重的。識字,係福氣黎。 但阿仔唔識咁諗,而家d人唔會咁諗。佢地打字架,邊知道咩叫一字墨喺從來得來不易﹖   當日咁啱有樂隊表演爵士音樂,叫Groovylife,一直表演到黃昏。

3歲 · Uncategorized · 周圍去

韓國之旅﹕濟州—涉地可支、Ecoland、濟州大學

黎到第二日嘅行程了。天氣一般,天陰陰咁。呢度係我地間民宿出面嘅小花園。唔落雨還好,一落雨氣溫馬上跌幾度,3月尾4月頭嘅氣溫大約10度左右。仲要有D風,小朋友為穩陣起見,即刻著返件羽絨先。哈哈,我同老公都冇帶羽絨,否則唔知會唔會原機遣返呢﹖   濟州國立大學 老公一心黎韓國影樓花,第一件事去濟州大學先。天氣真係麻麻地。但都好多人黎呢度影相,唔少係本地人。兩旁種滿櫻花樹,附近仲有個大草地,如果天氣好,真係會幾令。不過當日微雨刮風,都幾凍。加上我喉嚨火燒一樣,食左藥都冇好過,反而好眼訓。有景都冇心情睇。   除左天氣麻麻地,令我唔係太雀躍,最要係我當時病到五顏六色呀!阿仔因為出發前睇左醫生,有抗生素食,但我當時只係感冒衫起,醫生都係畀D普通藥我。但係冇用咯!沿途我咳到死,喉嚨又好很痛,連吞口水都痛!食左藥又眼訓,真係咩心機都冇曬!   ECOLAND 去完大學,天色一直都麻麻地,既然都影唔到咩相,老公就提議去ECOLAND。事前我都唔知係咩黎,原來係一個好大嘅主題公園,講明係ECO,全個公園都以自然環境為主。抱歉,我當時真係太病,天寒地凍,阿仔又唔聽話,我心情真係好差,冇乜影相。ECOLAND最特別係佢有幾架唔同主題顏色嘅小火車做交通工具,貫穿所有景點。班次好密,你隨便跳上一架列車,站站停,覺得啱玩就落車,玩完後喺站頭等下一班車就可以了。 當天又落雨,同埋都有唔少遊人,心情麻麻。見到呢個Lavender, green tea and rose garden, 有期望!可能花期唔啱,期望嘅花海係見唔到,淨係幾塊花田。 濟州市地下街 完成ECOLAND之後,我地去左濟州市唯一嘅地下街,同葵芳廣場有啲似,不過通道闊好多。成條街都好長架,我知道遲下會去首爾,所以我一直都好忍手,唔敢太放肆住。但我個樣勁殘,咁梗係要睇下有咩化妝品可以補救^^。其實好多品牌香港都有,ETUDE HOUSE 呀、INNISFREE呀、咩NATURE之類果D、FACESHOP咁…BANILLA…我都唔記得咁多。但我只係畀ETUDE HOUSE吸引左入去,好快就入手左支粉底,佢話係BB Cream,其實我覺得係粉底,仲有一支唇膏加潤唇膏同眼影base,後來喺首爾仲入手埋支blush。成個韓國trip我就係靠佢地。可能氣候問題,喺香港時我唔覺得佢地d化妝品有幾神奇,但一去到佢地本土,用本土化妝品,只有一個字,就係「正」!真係好好用,又易推,遮瑕一流,又唔假,要做到韓國妹果D白面女鬼妝一D都冇難度! 「血拚」左幾支化妝品,老公就話要走人喎…大約係晚上8點幾左右啦。司機叔叔就帶左我地黎呢間野食。一睇個樣就知係超hae嘅餐廳,但勝在價錢的確經濟實惠。我地一邊食,就發現唔少香港人啦、大陸人台灣人都黎呢度食……我諗呢個就係司機叔叔帶我地黎嘅原因。   租車遇著個連基本英文都唔識嘅司機真係好澤駛。話說我地就係食完野諗住出去搵佢返屋企。明明出門口時仲見佢喺度,諗住行去對面玩具店買架tayo車仔畀阿仔。佢突然行快左,我地又冇叫住佢,轉個彎就唔見左佢啦。呢件事又搞到老公好興,覺得好麻煩。因為老公唔耐煩,又搞到我心情麻麻地。因為我地只係用wifi,冇電話服務;佢又唔知係咪唔識用whatsapp,msg佢好耐都冇回應。最後要問人借電話,仲要叫人幫我地做翻譯,先叫得返佢去餐廳門口接我地。 唉,就咁搞又冇左半個鐘…你話我如果拎半個鐘再行下地下街都好丫… 叔叔完全零英文,中文都係「些些」兩個字。佢有咩要同我地溝通,都要打上台搵個好似即時翻譯咁嘅服務,哈哈,就算有咁嘅服務,有時都雞同鴨講。例如我地想同司機表達不滿,唔知個翻譯姐姐譯到幾多呢﹖   涉地可支 Seopjikoji 其實好似墾丁。 主要係影油菜花。   哈,果晚嘅晚餐又唔錯喎!我地都唔覺意黎到呢條咩麵條街。我地實在太肚餓啦!一入到去,d姨姨就畀左碗麵小朋友。老公問我係咪免費喎,哇我同佢一齊入去我又點知呢﹖唔理啦!一於就畀阿仔試下啦!點知阿仔出奇地超鐘意碗麵,乜餸都冇,齋麵都食左一碗。我地都分別叫左兩個大麵,可能因為肚餓啦,我覺得勁好食。果晚我覺得食得開心。 到左第二晚,我地再去,仲叫多個豬手。呢個係我話點嘅。我原本以為係roasted豬手,點知上到黎就…係我一個人食曬咯。   喺韓國食野好開心,淨係配菜都咁多碟。我幾鐘意食配菜。唔同餐廳會有自己嘅配菜,有d 「葉」蘿白,有d係芝麻紫菜,有d又一條條辣辣地嘅蘿白絲絲,我就好喜歡用佢地黎送飯,超好食。 在地感想﹕韓國之旅 + 韓國呀,我唔捨得你呀! 2016年3月29日﹕首爾轉機 韓國之旅﹕第一天濟州

日常

Drawing lot

今期報左學水彩畫。 比想像中更難。 大學時有學過下畫,記得就係水彩畫令我又愛又恨。因為完全掌握唔到色彩運用,水同力量控制,總之唔係自己黎可以搞得掂的東西。 隔左咁多年,對水彩作品始終有啲愛慕,終於的起心肝學習。 第一堂講解用咩工具,第二堂就教左好基本的東西。先試平塗法(左上),再畫漸變(右上),最後試畫雲(下)。 第一張係睇完老師示範即畫。發現要掌握成個地方都係同一隻色好困難,根本就唔係睇阿sir示範咁容易。佢話起碼要練兩年先得喎😨 右上嘅漸變就更加⋯⋯我最滿意都係啲雲。原來平日望下啲雲,發下白日夢咁,真係唔會浪費時間架! 下面係第二次試畫。我覺得第一次仲好。有好多技術性錯誤發生。但反而比第一次試畫時更清晰。初時都唔知自己試乜,但試多幾次就發現紙張上嘅變化,顏色嘅演變都唔同阿sir的,明顯係好多野做錯左。有時問阿sir,佢地都未必即時點到我犯錯嘅地方。後來自己不斷試多幾次,漸漸就會知道問題大約係咩。 不過自己嘗試時真係有啲驚——好驚犯錯。這就是平日心內的潛台詞吧?戰戰兢兢的,這種感覺很討厭。試畫時老師並不會在身邊細心貼心指導的,只是有問題時就問他吧!不過我連問題是什麼都不知道呢!如何開口問?所以我就一直自己畫,叫自己細心留意圖畫的變化。  畫畫就是這麼一個發現和發掘的過程。 圖畫畫得好固然快樂,但過程中學習信任自己,聆聽自己,觀察自己,我想這樣更加重要。

睇睇睇 · 買衫衫 · 扮靚靚 · 日常

時尚跟我很遠

我估除非係做Fashion magazine or clothing industry or entertainment business, otherwise he or she would not say that Vogue is something familiar with. 早兩天到誠品逛,買了兩本關於穿著的書,又打書釘看了相關題目的書,是看了很多,很高興。 打書釘的,其中一本好似叫《時尚斷捨離》。 作者本身是時裝編輯,由年青人變成人婦的職業女性,慢慢地綜合了一些對穿衣服,購衣服和時尚的想法。其中一項是為什麼我們需要有百變的形象和造型呢?她建議不合適自己的衣服,就不用再猶豫要不要買了;也不需要因為今季大熱而考慮:「是不是有需要添置一下呢?」因為這些都是時尚業創造出來的需要,就是要你買衣服。她說其實不少人到了一定年齡,都已經知道自己大約適合哪種衣著和打扮。因此如果真的不需要,或者不喜歡,就無謂勉強了,更無需要有內疚感。她認為就算真的一成不變又何妨?為什麼要為了趕潮流勉強自己嘗試新造型呢? 我覺得作者說得很有道理。書中還有很多其他理論,例如更新衣櫥,什麼值得買等等。本書確是一本實用又貼心的小書,原則不過幾條,實行起來也非常容易,內容也十分貼近一眾普通女士們的真實需要。因為簡單易明,打書釘全本看過一遍後就放回書架上了,但我還是猶豫要不要帶回家…… 不過我相信女性還是喜歡買東西的。就算遇到千年心頭好,消費過後還是心思思想買別的。《一眼看穿你》就是一本很有趣的書。常說某種衣著某種打扮其實代表著那個人心裏的某種需要。You are what you wear, 有人穿了制服就變得神氣起來,有人一生都不敢穿bikini。除了那些身型不好啦、還是害羞啦之類的藉口,其實還有什麼原因令你拒絕它們呢﹖又或者明明很想改變自己穿衣模式,可是最後帶回家的都是和以前一樣的衣服,那是為什麼呢﹖要怎樣才可以改變呢﹖ 作者本身是心理治療師,透過個案的衣著和衣櫥,窺探埋藏在她們心裏其實是什麼。這個實在是有趣的事,因為個案的情況,大多數女性們都有啦,只不過她們的情況比較嚴重或些少而已。讀起來十分有趣和實用。 《穿顏色》。作者據說是日本非常出名的形象設計師菊池京子。的確在書架上還擺放了好幾本類似凡作品,叫《穿春夏》、《穿秋冬》等等,打開都是配搭好的衣著,引不起我的興趣。反而是這一本,前半部是作者過往發表過的雜誌作品,根據顏色重新擺列一次,竟然讓我有大開眼界的感覺,亦令我留意到平時看雜誌看不到的細節。簡單說就是這次的coordination給予我不少inspiration,我希望這些能夠讓我保持對衣服的敏銳,不要讓自己的打扮一成不變,最重要是不要因為慵懶而變得守舊沒趣。那麼就真的跟c9沒有分別了。 然後我帶了這兩本回家去。 在誠品的書架上看到自己已有的書,自己不禁莞爾起來。原來關於時尚的書,我都有不少,不過覺得自己距離時尚二字還是差很遠。雖然有不少衣服,但總覺得永遠不夠;又或者買衫時又總覺得老是買不到心頭好;有時甚至是覺得煩惱,因為自己身形改變了很多,然後又覺得現在流行的衣服cutting不適合自己云云,總之有九千萬個煩惱藉口,讓我不能痛快地豪爽地享受shopping的樂趣。因為我總不太確定自己的style是什麼…再說下去,又是沒完沒了。 我不是要變成什麼stylist or 追趕潮流的人。只是單純覺得改變了衣著,內心的樣貌也會跟著改變起來。穿衣就是一件這麼神奇的事,和化妝一樣;有時改變了外在,內在也會跟著改變起來。透過衣著來改變、認識自己,實在是一件非常有趣的事情。