飲食 · 日常

兔兔肉醬意粉

返學都成個月了,小朋友都習慣返上午班,不過每朝起身都會掙扎一輪咁咯。 過左嘅暑假,我煮得最多畀佢食嘅就係肉醬意粉。因為有時我冇煮午餐,就會一齊去快餐店,點得最多嘅就係肉醬意粉。佢每次都食過返尋味,不過出面食得味精多始終唔係咁好,所以我會煮畀佢食。 平時我係煮普通意粉,即係spaghetti, 早幾日見到呢隻兔兔意粉好得意,小朋友一見到即刻攬住放喺心口話要食,見佢咁堅持就帶佢地返去啦。 意粉有三隻色,我估係正常味、甘筍味同青椒味,食綠色果隻時真係有少少椒味!肉醬意粉最易煮,難得小朋友鍾意,煮多幾次都仲得。煮肉醬意粉最緊要先加蒜粒落去炒,食落去香好多!今次仲加左洋蔥粒、蕃茄同切碎左嘅菇碎落去,加埋茄醬炒,就算小朋友唔食洋蔥同菇,咁樣撈埋食都唔覺,照食無誤(≧∇≦)。