3歲 · Uncategorized · 日常

好好地哭

我有幾耐冇喊過呢? 對上一次喊,係幾耐之前嘅事? 其實唔係好耐,只不過係對上一次period. 喊嘅原因可再寫另一篇post (即係long story)。 冇人時會放聲大哭,自言自語,自問自答咁,邊喊邊講野,所以我每次喊,都要自己一個人。 有人時就要搵個最好冇人騷擾嘅地方匿埋喊,靜靜咁喊,忍住唔出聲咁喊。呢個地方多數係浴室⋯⋯ 其實我幾鍾意喊。每次喊完,我都會覺得好似舒服左。喊嘅過程對我黎講好重要,好似一個個人對話咁,平時唔會諗或者諗唔到嘅說話,都會在呢個時候呯呯聲咁閃入我腦海裏。 所以喊完後,頭腦好似清晰左,或者有啲新想法咁,so refreshing! 今次係關於我老豆。 事緣同仔仔傾下計,傾傾下就講起我細細個好鍾意跟我老豆去食早餐,因為每次實可以趁佢買報紙時,搭單買本公仔書,或者漫畫、雜誌之類。最正係佢從來唔會囉嗦我:「做乜買呢啲書黎睇?」「唔准睇公仔書。」「你做曬功課未?」之類。佢從來唔會過問我點解會睇呢啲書,或者買呢啲消閒讀物嘅理由;亦唔會干涉我嘅學習,或者明示暗示我一定要睇邊啲書。每次食早餐就係我成個星期人生最高峰,最渴望嘅時間。因為果個時間讓我感到自己好似個大人,自己揀乜自己話事;最多係啲好貴嘅書仔唔會買,大部分當年三十蚊以下果啲,我老豆係真係眼尾都唔望一下我揀左咩書,就連同佢疊報紙一齊畀錢。 入到餐廳,就梗係佢有佢睇我有我睇,通常老豆嗌件多士飲杯啡,五分鐘就行得。但佢每次都會等我食完我份全餐,然後佢就起身埋單,我地離開餐廳後就分道揚鑣,因家有惡母,我一定係直接歸家,老豆就返工了。 咁嘅weekend陪伴左我十幾年,由小學到中學都係。仲記得預科時仲專登走堂,都係為左果份感覺。 我同老豆成餐幾乎都唔會講野,後來好似默契咁,見佢啲動作快慢,自己就要執生醒水跟貼啲。 諗返起呢啲種種回憶,眼淚就不覺流出來,究竟係我掛住老豆,定係咩原因呢? 我唔知道。但我心裏面好激動,眼淚不停地流出來⋯⋯ 我知道呢個世界上唔會再有咁嘅男人做我老豆。唔會再有人能夠畀到果種放任,但又百份百信任嘅愛畀我。呢種毫無條件嘅信任令我成長充滿自信、樂觀同積極。佢畀我嘅信任,令我從來冇懷疑過,甚至唔會懷疑自己,我好肯定自己係有價值嘅人。 呢份愛實在太強,強到就算佢過身,我個心一直好平靜,我相信佢冇怨恨過我地任何一個人,冇話我地仔女做得夠唔夠好,或者對我地有咩期望而未完成的⋯⋯佢嘅愛大到令我覺得自己對佢冇遺憾。為左呢樣野,我一直好感恩⋯⋯直到今時今日都係,諗起佢,我個心都係充滿感恩,好想同佢講「多謝」⋯⋯,但我知可能就算我真係再見到佢,我估我講唔出口,唔知點解⋯⋯ 跟住我就會比較自己同佢,我對仔仔嘅愛,能唔能夠做到好似佢咁,畀子女無比嘅肯定呢?我諗我仲未做到。 撫心自問,我對仔仔好多時都唔係好有信心的。即係你做到我梗係開心,但做唔到我都唔緊要,唔會介意。所以我寧願冇乜期望,我好怕自己會變成虎爸虎媽,將自己果套硬崩崩地套入小朋友身上。 自覺都算係好強勢嘅人,我要做嘅野,其實真係冇人阻到我。當我受挫或面對挑戰,好多時我都會變得好暴躁,然後就會好唔理智咁鬧人、甚至可能講好多好難聽嘅說話侮辱人,即係果啲典型白羊座嘅人。但其實我冇野架(攤手),脾氣過左就冇曬野。 但係我知說話會傷人。自從認識左惜字如金嘅老公之後,我更加明白說話嘅威力。 可能我曾經試過隨隨便便都能夠講一大堆無無謂謂、言不及義嘅說話嘅日子(即係吹得),我已經好討厭自己口若懸河,自high自擂果種感覺。可以嘅話,我一定要用說話造就人(出下口術令到大家開心下,何樂而不為?),好過豬up埋啲無厘頭無意思,甚至係蓄意害人,旨在令人唔開心嘅說話。 對仔仔,我多數都用「肯定」嘅說話,代表我認同佢,肯定佢。但問心,好多時我都唔確定佢有時某啲野係咪真係做得好或者做得對,我都唔知個標準喺邊度。 但突然觀乎我老豆對我嘅態度,我唔知佢係咪真係百分百肯定我,但起碼佢「放任」,完全好似唔管我嘅態度,令我相信:「佢係信我先畀我咁做姐!」,亦因為為左保住佢對我呢份「信心」(自由),我亦會好識做從來唔會cross the line;玩還玩,巔還巔,喪還喪,有啲野始終我係唔做得,所以我一定唔會去做。 我承認我對仔仔嘅管教都幾係「承傳」左老豆果份放任,但係對佢黎講會唔會唔係「自由」,而係放縱呢?我能唔能夠真係讓仔仔做到對自己有信心、肯定自己價值;佢有佢自己生活態度,但同時亦尊重我呢個老母,我真係唔知自己能否做到。

3歲 · 周圍去

澳門行(多相)

5月中,我同老公放低小朋友喺奶奶度,然後好好地、圓滿地、充實地咁過左澳門渡個三日兩夜嘅假期!😊 原本老公同佢朋友約好左,6月初兩家人一齊過去玩。老公認為同小朋友一齊其實好難真正渡假,所以佢就提議不如黎個pre-trip trip先啦😆😆😆,我梗係舉腳贊成! 等埋老公放工我地就坐黃昏嘅班次出發。到埗時都係綿綿細雨,我地行去對面巴士站坐酒店專車,幾分鐘就去到酒店。   萊斯酒店 老公搵到間好靚嘅酒店﹕萊斯酒店。原本剛剛坐完船嘅我仲暈暈地,而且落雨搞到成身濕曬,up住個人好唔舒服。一入到去見到佢嘅裝潢,天花板吊住幾盞巨型水晶燈,室內裝修模仿美國18、19世紀維多利亞式設計,仲有酒店獨有香噴噴嘅味道,入到去真係成個人放鬆曬。 酒店只有三層,地下係大堂、餐廳,二樓三樓先係客房。唔少人都黎呢度影婚紗相,都幾有歐洲feel架。   係咪好令呢﹖;)  除左巨型水晶烙,仲有條樓梯慢慢咁轉落去,我覺得自己好似走左入D介紹鬼佬大屋嘅室內設計雜誌咁,真係富麗堂皇呀^^   都話左佢係模仿維多利亞式設計,咁呢D Fireplace梗係唔少得啦!我都好想自己屋企有返個!我就係特登叫老公同我影左張,等將來屋企再裝修時參考一下。   好肚餓呀!check-in settle down之後即刻出去醫肚啦!話說此行係隨意行,乜野都唔plan (我唔plan…我一向都唔plan架啦~~),所以食乜玩乜都係就地決定。果晚好大雨,我地問酒店借左把大遮,沿住漁人碼頭行,就想搵間比較有特色嘅食店。 後來我地搵到呢間葡萄園餐廳,講明係食葡菜架。我一向都唔係好好葡菜,即係諗到一pat黃色嘅醬。咁話明旅行係放空心情腦袋,最緊要係open-minded,一場黎到就試下啦!哇,真係冇揀錯!唔入黎就真係後悔啦!   葡式海鮮炒飯⇓   老公話唔覺咩特別,可能我肚餓啦!我就覺得好好食,d海鮮好鮮味,同喺香港食嘅海鮮飯真係唔同架!   左邊果個叫非洲辣雞。原本我都驚真係好辣,叫自己做辣雞喎!但原來係ok辣啦!但係勁勁勁惹味!我又係一d都冇後悔點左呢個!都係果句,老公話冇乜特別,但我就覺得超好食!!成巡飯都食得好開心!老公就覺得我莫名其妙natural high,認為我嘅證供唔可取。不過食得開心就冇所謂啦! 漁人碼頭 食完飯之後雨就停左…….一陣。我地趁機會周圍行。漫無目的咁沿住漁人碼頭行,見到開左好多酒店,有幾間仲要就黎開幕。入面裝修好令,1樣樣野都好宏大﹕樓面好高,石像好高大等等,呢d我喺香港好少見。不竟香港土地問題,乜都將貨就價,樣樣野的的色色咁。但呢度係比香港更細嘅澳門,唔係真係歐洲,又唔係大陸,但人地有空間做到呢d…果一刻我覺得自己眼界跟住土地空間擴闊了。 呢jar意大利式建築相信係隨住威尼斯人嘅成功而接住出現。呢d都係屬於另一「勵」系酒店,漁人碼頭聽本地人講係屬於本地有錢佬,人稱碼頭佬,果幾間「勵」字開頭嘅酒店都係佢。 酒店未起好,我地就趁住夜晚冇人入去影下相玩左陣。   玫瑰聖母堂 過左一晚,我地坐的士去到議事堂前地,就由果度開始漫無目的咁行。澳門出名多聖堂,可以的話都想逐間入去睇。第一間參觀嘅,差不多係地標——玫瑰聖母堂。澳門聖堂跟香港的很不同。香港的大抵都進行了不少加建和翻新,設計較時尚一點。澳門的跟我在歐洲看見的都差不多!由聖堂外牆至堂內的擺位和設計,都是非常歐式的!跟香港的完全不同!這些點滴都讓人看到天主教在不同地區發展的歷史變化!   早上看過了聖堂後就吃了一個普通而不甚好吃的午餐。   盧家大屋 接著我們來到盧家大屋。喜歡中式建築的,強力建議一定要來這裏跟下文介紹的鄭家大屋看看。我諗清末時期,香港同澳門其實分別唔大。屋內有展覽介紹當時屋主係咩人,有咩人住喺度等等小資料。呢間大宅可一窺當時中國大戶人家嘅生活環境係點樣,再加上小小想像力,就好似睇緊文初劇呀,或者睇小說咁。好得意! 估唔到以前嘅人(清喉嚨)應該係有錢人嘅生活真係咁精緻。d屏風呀,呢個天井設計尤甚特別,喺香港真係未見過!我幻想以前d女士仲要紮住腳咁喺呢間屋行黎行去,出出入入都有妹仔服侍,唔知以前d人感覺會係點呢﹖當佢地見到現代女士連餐飯都唔識煮,又要拋頭露面做野,有d仲養埋一家大細咁,唔知對以前嘅女士有幾大衝擊呢﹖   入到去其實好舒服,人不期然會自動安靜落黎。入面d廳房全部四四正正,絕對唔會三尖八角,d床又大張。我估呢d就係中國人建築其中一種特色,講究恪靜、空同大自然美。   我最鍾意呢d一入門口就見到嘅養左金魚嘅水池同果樹。香港饒宗頤會館都係咁。入到去一眼就望住個魚池,心就會慢慢靜落黎,出面有幾喧鬧都唔關呢刻嘅事了。   主教座堂 我地一直向山上慢慢行,黎到主教座堂。聖堂出面就係一個廣場,好似意大利果啲咁,聖堂出面一定有一塊大大的平地,讓唔同嘅人喺度hae下,休息吹下水咁。聖堂除左做崇拜嘅地方,亦有少少社區服務性質。入面同天主傾計,廣場就留畀左鄰右里連系嘅地方。香港聖堂似乎冇咁嘅地方做社區野,一大塊平地hae喺度唔起樓更買少見少,愈黎愈懷念回憶中的香港。 瘋堂斜巷 呢座建築物據說以前喺收容麻瘋病人嘅,所以今日呢帶就叫瘋堂斜巷。成間屋都係葡汁色的,又有紅紅綠綠嘅顏色,同香港舊式建築物好唔同。大家都係殖民地,但色彩好唔同,會唔會係葡國人係活潑啲呢? 澳門隨處都見到呢種小街小巷,路面唔係用瀝青鋪的,而係好多粒好細塊嘅磚仔砌出黎,中間仲有唔同嘅圖案區分。 但係建築物普遍好陳舊,牆身好多油漆已經一塊塊剝落,又好多塵。不過就咁睇真係好似歐洲小街。香港已經冇曬呢D景致了。   婆仔屋 沿住瘋堂斜行一直上,就係婆仔屋了。婆仔屋來源我唔清楚,而家入面全部變成art gallery或者公共機關。入面仲有間小店,小店及產品包裝行vintage路線,入面擺賣的全都是店主從葡萄牙入的產品。後來才知道原來是很出名的天地百貨。難怪當天我聽到有香港人說專情過來找這間小店呢!那天我的喉嚨不太好,店主很好人的給我試試正在擺賣的香草薄荷糖,食後真的覺得喉嚨舒服了不少。不過又怕大熱天時帶著包會融掉的糖,最後沒有幫襯就走了。店主很好人,都沒有白眼我……。… Continue reading 澳門行(多相)

3歲 · kindergarten

著錯衫

雖然這7月15號係last day,其實小朋友幾乎返埋今個禮拜就放暑假了。 今個星期有四日係活動日,星期五就家長日。下星期佢返多兩日就放假,一日係生日會,另一日係畢業禮。 但係⋯⋯我又搞錯左啦!今日我同佢著左套新衫,拎埋個party bag返去開生日會。行到學校附近見到其他小朋友都著校服嘅?😨😨😨 烏龍嘅我知道九成九係我搞錯左日子啦😱😱😱 「乜唔係今日咩?乜唔係今日咩?」表面嘅我好鎮定咁拖住小朋友往學校行去,心裏面嘅我確實有點驚慌同惜手不及,馬上拎本schedule book出黎check下(好彩早排有時間mark低呢啲日子!)uh-oh…「原來媽咪真係搞錯左喎!原來今日唔係生日會,要著校服架!」小朋友即刻急起上黎扯住我唔肯行:「我要返屋企換校服。」我盤算好唔好返去換校服定如常返學呢?因為又怕佢覺得同人唔一樣會唔開心,但又遲到喎⋯⋯ 最後當然頂硬上啦,我扮到冇野咁同佢講:「唔緊要啦,去街衫仲舒服過校服啦!」半ark半氹咁送佢返學。 去到學校門口竟然有另一個妹妹著到Elsa咁同個姐妹企喺度,啲老師面有難色咁好似唔想畀小朋友入去。 老師見到我地就作驚訝狀咁:「今日唔係生日會呀!」企喺門口嘅校長瞪大眼睛,有點晦氣地話:「今日唔係生日會呀。」 「係呀,唔好意思係我搞錯左!」我即刻補飛。 「小朋友都有責任喎!要提媽咪!」老師嚴肅地說。 然後就冇人理我地,又好似唔想畀我地入咁。 陸陸續續都有好多著校服嘅小朋友入學校,等左陣先有老師同Elsa入去,然後又有小小晦氣咁拉住小朋友入去,仲話左幾句⋯⋯ 我覺得著錯衫係小事,講清楚,道歉咪冇問題咯。但啲老師同校長反應我覺得有啲over,好似做左啲好唔應該做嘅野咁。犯錯唔得架?錯係嚴重罪行呀?我有啲嬲嬲地。我走上去同老師補飛:「畀佢當開多次生日會啦!」 反正都係要上堂架啦,點解唔可以畀小朋友學習下犯錯時可以用一個比較正面嘅態度去面對呢?佢地點解要令佢feeling shameful 呢?It is not a sin, it is not a crime, just another lesson to learn.  Making mistakes is inevitable throughout our lifetime! There are so many things we could screw them up in the future! I am… Continue reading 著錯衫

3歲 · 玩玩玩 · 去街街

愉景灣 Discovery Bay

上星期突然紅雨,搞到全香港唔駛返學,之後成個禮拜變得離奇通爽,日頭我唔開冷氣都仲得! 我地趁周日出左去愉景灣行下。本來老公想影相,但時間晏左少少,去到已係黃昏,我地只係去左個沙灘就算。 出發前阿仔好興奮,係咁話好野,有得去沙灘!仲前叮萬囑我地帶堆沙工具。沿途佢都好興奮,成日擒上擒落。唯有同佢玩下個APP,等佢可以坐定少少,唔好影響人。坐船過去佢又好開心,我坐佢後面同佢一齊睇風景,同佢傾下計,「呢個係貨船,呢個係浮標」等等,我同佢都好開心。   天氣好好。原意係鋪張沙灘蓆喺度,跟住佢自己由發揮……   出乎意料,小朋友去到沙灘唔肯落地。其實佢都唔係第一次去,爸爸一直拖住佢隻手仔行,佢就喺後面縮縮下咁,我見佢D手指都屈曬起黎。佢好唔習慣喺沙上面行果種感覺,一直大吵大嚷要大人抱起佢。 小朋友全程唔肯落地。佢爸爸好失望,原本以為會同佢好開心咁喺沙灘追逐,但阿仔反應完全係另一樣野——驚驚青青捉實大人要抱。後來我地帶佢去公園玩下,諗住有個熟識D嘅環境,可能可以令佢放鬆一下。但小朋友好似regressed左咁,d馬騮架佢唔肯爬,滑梯都唔係好有興趣。佢老豆好失望,跟住就企喺佢隔離ON居居咁,已經唔想同佢玩了。 呢種情況都唔係第一次。 小朋友比較怕生,去到陌生環境,好容易蛇kuare。同佢去新地方,要畀多d耐性佢。呢樣野佢老豆成日都唔記得左。 後來佢終於肯落草蓆玩,但係都係唔肯落沙地。我專登放d玩具遠少少等佢離開「安全區」,都唔係好work。唯一一次係要玩倒水倒泥,佢即刻二話不說標出去推開個桶,之後又縮返去張蓆度。   佢老豆超灰,全程發呆。   之後我地出返中環,坐叮叮去cwb食野。小朋友開心曬,佢好鍾意坐叮叮,明明抱住都要落地行去電車站。 今日返學畫交通工具,小朋友揀左電車。 原來佢咁鍾意電車,我而家先知。

3歲 · 去街街

油街實現

母親節,我地冇咩特別節目。 做全職媽媽,對我黎講日日都係母親節。 天氣一般,就去左近近地嘅北角行下。 油街實現其實係油街十二(號)嘅諧音。同牛棚幾似,都係古舊建築物改裝,變成發表藝術作品用途。地方勁易搵,炮台山地鐵站出,過對面馬路,一直行向右過條馬路仔已經係,五分鐘都唔駛。 記得以前每日坐108返工,日日都會經過呢度的。 地方唔大。地下有兩個小展館,上面係寫字樓。近門口有一間好細,類似coffee shop但唔係coffee shop的東西。前面有個花園叫「白做園」。   入面有個鐘,阿仔超鐘意,勁敲冇停手。   展館一號題材係「買樓」。   自稱小車迷嘅小朋友睇睇下展品,突然大叫﹕「咦﹖有Henry喎!」 玩具呢家野,真係逃唔過小朋友法眼的。   我知…展品有張床,咪扮野玩下咯~~~   呢個幾好玩。喺塊水松板上面畫幾條線,再用其他物料整幾架車,小朋友就喺度停車泊車玩左好耐。   阿媽成日叫我去廁所唔好睇書,話唔尊重d字喎。我明白佢意思,但唔知佢呢個理念點黎。睇到呢個,我估以前上一代嘅人普遍都有呢個想法。展品仲要參觀者試下跪喺度寫字,字,係要尊重的。識字,係福氣黎。 但阿仔唔識咁諗,而家d人唔會咁諗。佢地打字架,邊知道咩叫一字墨喺從來得來不易﹖   當日咁啱有樂隊表演爵士音樂,叫Groovylife,一直表演到黃昏。

3歲 · Uncategorized · 周圍去

韓國之旅﹕濟州—涉地可支、Ecoland、濟州大學

黎到第二日嘅行程了。天氣一般,天陰陰咁。呢度係我地間民宿出面嘅小花園。唔落雨還好,一落雨氣溫馬上跌幾度,3月尾4月頭嘅氣溫大約10度左右。仲要有D風,小朋友為穩陣起見,即刻著返件羽絨先。哈哈,我同老公都冇帶羽絨,否則唔知會唔會原機遣返呢﹖   濟州國立大學 老公一心黎韓國影樓花,第一件事去濟州大學先。天氣真係麻麻地。但都好多人黎呢度影相,唔少係本地人。兩旁種滿櫻花樹,附近仲有個大草地,如果天氣好,真係會幾令。不過當日微雨刮風,都幾凍。加上我喉嚨火燒一樣,食左藥都冇好過,反而好眼訓。有景都冇心情睇。   除左天氣麻麻地,令我唔係太雀躍,最要係我當時病到五顏六色呀!阿仔因為出發前睇左醫生,有抗生素食,但我當時只係感冒衫起,醫生都係畀D普通藥我。但係冇用咯!沿途我咳到死,喉嚨又好很痛,連吞口水都痛!食左藥又眼訓,真係咩心機都冇曬!   ECOLAND 去完大學,天色一直都麻麻地,既然都影唔到咩相,老公就提議去ECOLAND。事前我都唔知係咩黎,原來係一個好大嘅主題公園,講明係ECO,全個公園都以自然環境為主。抱歉,我當時真係太病,天寒地凍,阿仔又唔聽話,我心情真係好差,冇乜影相。ECOLAND最特別係佢有幾架唔同主題顏色嘅小火車做交通工具,貫穿所有景點。班次好密,你隨便跳上一架列車,站站停,覺得啱玩就落車,玩完後喺站頭等下一班車就可以了。 當天又落雨,同埋都有唔少遊人,心情麻麻。見到呢個Lavender, green tea and rose garden, 有期望!可能花期唔啱,期望嘅花海係見唔到,淨係幾塊花田。 濟州市地下街 完成ECOLAND之後,我地去左濟州市唯一嘅地下街,同葵芳廣場有啲似,不過通道闊好多。成條街都好長架,我知道遲下會去首爾,所以我一直都好忍手,唔敢太放肆住。但我個樣勁殘,咁梗係要睇下有咩化妝品可以補救^^。其實好多品牌香港都有,ETUDE HOUSE 呀、INNISFREE呀、咩NATURE之類果D、FACESHOP咁…BANILLA…我都唔記得咁多。但我只係畀ETUDE HOUSE吸引左入去,好快就入手左支粉底,佢話係BB Cream,其實我覺得係粉底,仲有一支唇膏加潤唇膏同眼影base,後來喺首爾仲入手埋支blush。成個韓國trip我就係靠佢地。可能氣候問題,喺香港時我唔覺得佢地d化妝品有幾神奇,但一去到佢地本土,用本土化妝品,只有一個字,就係「正」!真係好好用,又易推,遮瑕一流,又唔假,要做到韓國妹果D白面女鬼妝一D都冇難度! 「血拚」左幾支化妝品,老公就話要走人喎…大約係晚上8點幾左右啦。司機叔叔就帶左我地黎呢間野食。一睇個樣就知係超hae嘅餐廳,但勝在價錢的確經濟實惠。我地一邊食,就發現唔少香港人啦、大陸人台灣人都黎呢度食……我諗呢個就係司機叔叔帶我地黎嘅原因。   租車遇著個連基本英文都唔識嘅司機真係好澤駛。話說我地就係食完野諗住出去搵佢返屋企。明明出門口時仲見佢喺度,諗住行去對面玩具店買架tayo車仔畀阿仔。佢突然行快左,我地又冇叫住佢,轉個彎就唔見左佢啦。呢件事又搞到老公好興,覺得好麻煩。因為老公唔耐煩,又搞到我心情麻麻地。因為我地只係用wifi,冇電話服務;佢又唔知係咪唔識用whatsapp,msg佢好耐都冇回應。最後要問人借電話,仲要叫人幫我地做翻譯,先叫得返佢去餐廳門口接我地。 唉,就咁搞又冇左半個鐘…你話我如果拎半個鐘再行下地下街都好丫… 叔叔完全零英文,中文都係「些些」兩個字。佢有咩要同我地溝通,都要打上台搵個好似即時翻譯咁嘅服務,哈哈,就算有咁嘅服務,有時都雞同鴨講。例如我地想同司機表達不滿,唔知個翻譯姐姐譯到幾多呢﹖   涉地可支 Seopjikoji 其實好似墾丁。 主要係影油菜花。   哈,果晚嘅晚餐又唔錯喎!我地都唔覺意黎到呢條咩麵條街。我地實在太肚餓啦!一入到去,d姨姨就畀左碗麵小朋友。老公問我係咪免費喎,哇我同佢一齊入去我又點知呢﹖唔理啦!一於就畀阿仔試下啦!點知阿仔出奇地超鐘意碗麵,乜餸都冇,齋麵都食左一碗。我地都分別叫左兩個大麵,可能因為肚餓啦,我覺得勁好食。果晚我覺得食得開心。 到左第二晚,我地再去,仲叫多個豬手。呢個係我話點嘅。我原本以為係roasted豬手,點知上到黎就…係我一個人食曬咯。   喺韓國食野好開心,淨係配菜都咁多碟。我幾鐘意食配菜。唔同餐廳會有自己嘅配菜,有d 「葉」蘿白,有d係芝麻紫菜,有d又一條條辣辣地嘅蘿白絲絲,我就好喜歡用佢地黎送飯,超好食。 在地感想﹕韓國之旅 + 韓國呀,我唔捨得你呀! 2016年3月29日﹕首爾轉機 韓國之旅﹕第一天濟州

3歲 · 玩玩玩 · kindergarten · 日常

Painting with food colouring

OK, I am trying… 從韓國回來三天,小朋友又在學校給傳染了。從星期三開始便咳起來,又有鼻涕。到了第二天起床,雙眼皮又出現了,於是決定留在家裏休息。 小朋友十分高興, 但我卻有點點4戰敗的感覺,畢竟上學是小朋友必須做的事,不能因小小事而放棄。可是想到有點睡眼醒忪的他,坐在學校裏,不知不覺又再被傳染,又覺得有點擔心了。 在家也找點事做,最好就是Art exercise了。想起上次給他用海棉印畫畫,本來以為不喜愛美術的他,竟然玩得非常專注。每次提到畫畫,他都嚷著要玩「印人仔」(那些海棉是人仔形狀)。今天既有時間,不如就好好玩玩了。 今次用了食物顏料給他做顏料,給他一張畫紙、畫筆,用水稀釋顏料後,就讓他自由發揮了。用食物顏料開出來的顏色較淡,不過卻有不同香味,的確不錯。   他玩得很投入。一開始他不是塗在畫紙上,而是要像我開顏色一樣,不斷在調色碟調配顏色。原本我叫他要專注畫在畫紙上。但後來我覺得美術就是自由發揮時間吧﹖他喜歡玩顏料就由他好了。  他用過畫筆後,又會把手浸在那些洗筆水裏,在我眼中當然覺得這是「錯」的,不過他又樂在其中。我想,藝術就是這種自由發揮,不理他人眼中的對與錯,想做就做吧﹖      他說﹕「人人在屎屎上。」我估我們日常生活實在講得太多此類話題了。   他最喜歡用力把海棉裏的水揑出來。不知道他在做實驗,還是想試試要什麼感覺呢﹖   我覺得美術是一個很好的媒體,讓小朋友把心裏的感受抒發出來。今時今日的小朋友雖然物質十分豐富,卻活得少了一份自由。每天睜開雙眼那一刻,便已經有人催促你食飯、上堂,或者準備上興趣班。然後一直有人服侍食飯(利申﹕阿仔都係要我餵食的…-_-!!),出門口時又有人已經幫你準備外套。行路時又要拖著大人,不准做這些那些……上堂又要套規矩乖乖的坐好聽老師說話……我明白不少規矩都是為了小朋友好,讓他們學習紀律與合群,和別人相處等等,不過我覺得對三歲小朋友來說,就算間中不太規矩也不壞吧﹖人生流流長,要聽話規規矩矩生活的日子還多著呢,難得有大人照顧,小朋友任性,也是一種福氣吧﹖   《太陽的後嗣》 近來大熱,舅母也從韓國買了一套劇中宋仲基常穿的軍服給小朋友,當然只是一套輕便的運動衫,只不過是迷彩圖案。頭上頂住一條蔥辮就當是剛陽配搭的一個小點綴吧^^。