想像力
4歲 · 日常

想像力

martharitagoLeave a comment

想像力是一件很奇妙的東西。 閒置在家沒事做，小朋友無時無刻都要玩。隨便拿到什麼，只要想像一下就變成另一樣東西了。 幾塊積木與一桶膠波，不知什麼時候變成了水。小朋友一邊拾起積木和膠波，轉頭又成桶「水」倒落地﹕「倒LU，倒水LU，倒曬D水去~~~」，不停地拾起，又倒；再拾起再倒，如是者重重覆覆玩了十多回都未厭。靜下來望著小朋友玩得如斯投入，自己是否曾幾何時都是這樣成長呢﹖跟弟弟玩煮飯仔，對著眼前的膠菜膠食物，還不是認真地煮著，還要開餐廳邀請客人點菜煮飯﹖這全都是假的，但卻玩得十分高興。 小孩子能對如此簡單的事物都認真起來，投入地玩起來，那是多麼幸福呢﹖   玩得興高采烈，小朋友又突然發現一個新玩意了。就是這樣，把蓋蓋在三個膠波上，蓋彷彿似飛碟一樣自己動起來。我沒有解釋為什麼那個蓋會自己走動，覺得如此一解釋，彷彿整個遊戲就會變得不好玩了。 我問他為什麼那個蓋會自己走呢﹖大家看了一會兒，我嘗試大力吹，看看有什麼事情發生呢﹖可能是力度不夠，膠波是有輕微晃動，但力度不足以推動蓋走。小朋友已經認定那個蓋是一輛車了，他馬上把乘客取過來放在蓋上。就是這樣玩了一會兒，小朋友玩得很開心。我也覺得很幸福。 曾幾何時，我們不是因為幾個已經玩到差不多要爛掉的洋娃娃，和一些殘舊的紙牌屋玩得興高采烈呢﹖

4歲 · 去街街 · 日常

地鐵遊

martharitagoLeave a comment

某天小朋友沒有上學，所以跟他去了康城站一趟。 每次乘搭地鐵往坑口，總會遇上去康城的地鐵，他問我康城在哪裏，我總是答不上咀。今次我們特意乘搭往康城的列車，一起看看那是什麼模樣的。 正所謂未出發，先興奮；我想他跟往沙灘比較，兩者的興奮程度都差不多。我們到了月台後，選了一張椅坐下，靜心等待往康城的列車到達。小朋友比平時更專心留意究竟往康城的列車什麼時候才到，靜靜地看著一列又一列的地鐵經過，大約過了十分鐘，「往康城嘅列車現在到達」，一把熟識的女聲在月台宣佈列車到了。「到啦！」小朋友馬上起身拉著我的手，在幕門前等待列車。 「拿，我地而家上車啦！」我拖著他的小手往車廂走，因為是非繁忙時間，車廂沒有太多人。列車經過紅彤彤的將軍澳站後，做沿著漆黑的隧道前進。車廂傳來響亮的「勁共勁共」聲，小朋友有點緊張，不斷催促我起身走到車門準備下車。 我嘗試轉移視線，叫他看看長長的車廂，是否像一條虫在走動呢﹖車廂轉彎，虫子都跟著轉彎了。大家都覺得很有趣，很快便來到康城站。 康城站跟平常的車站一樣，沒有四通八達的隧道，只有兩個出口；列車班次較疏，所以車站人流不多。最多只是列車到站時，就有一群人往康城屋苑方向散去。我們往另一個方向行去，一路上人影都沒有一個，而且有點殘舊的，出到去就是寬大的巴士總站。職員說附近有單車徑，但目測範圍則看不到。那天天氣很好，陽光猛烈，我又帶住一個小朋友，馬上就放棄徒步往單車徑的念頭。 每次跟他影相都這樣，沒有一張正經的。 既然出到來，就跟小朋友周圍逛逛。列車從康城出發，接駁將軍澳線的車站就是將軍澳站，我們從那兒下車往「歡笑樂園」去。小孩子最喜歡這些遊戲機，男孩子尤其喜歡車，巴士、警車和直昇機都玩過後，答應只玩三個遊戲的承諾兌現了。 樂園旁邊是12蚊店，當然要去走下。店已經擺滿聖誕節有關物品，真想買些東西回家裝飾。不過因為要離開「歡笑樂園」，小朋友十分不捨，嚷著不肯走。我只能匆匆看過聖誕裝飾一欄就要的起小朋友盡快離開好了。(>_<) 下午茶時間，我們到附近的餅店點了個cake set。小朋友點了一個焦糖香蕉蛋糕，wow，出奇地好吃。吃蛋糕時，小朋友自己玩貼紙書，我就有一丁點的空閒時間享受我的咖啡了。 就這樣子又過了一天——平凡卻是輕鬆的日子。這種日子有時年復年日復日看似一樣的，有時自己都會慨嘆：「時間就這樣流逝了！」細心想想，能夠每天陪著小朋友一起生活，創造一些回憶，心中無比滿足和感恩。

4歲 · 玩玩玩 · 去街街

大清水2灣

martharitagoLeave a comment

前幾天香港還是很熱，一點冬天的感覺都沒有，白天還是要穿短袖衫和薄褲。 咁啱佢有幾聲咳，索性留喺屋企休息下，免得返學散播病菌。但見佢精精神神行得走得，天氣又咁好，忍唔住又想同佢出去行下。於是我同佢講：「快快趣食完飯就有得去沙灘！」 講完後食飯速度冇快過，但就開口埋口都講住同沙灘相關嘅野，又話要帶啲咩去咁⋯⋯終於等佢食完晏仔，我地就一齊出發去大清水二灘。 為左爭取時間，唔想去到已經日落，專登「斥資」坐的士一程車到。小朋友全程好肉緊，問左我幾次幾時到，去到上洋村果頭，佢突然爆左句：「乜原來沙灘係咁遠架？」下？乜你而家先知呀？可能我地屋企望到個海，所以佢以為好快就到。小朋友啲思考真係好得意^^ 因為係平日，沙灘冇乜人，多數係外籍人士同埋曬到磚灰色咁嘅阿叔著條褲仔攤曬喺沙地曬太陽😎😎😎。原來有咁多單身阿叔專登喺平日黎沙灘曬太陽的⋯⋯ 仔仔初時唔肯影相，我同佢講返：「你而家唔影，咁你就冇得睇返你自己啦。」之黎佢就好合作⋯⋯左幾秒咁多。 佢話要黎沙灘，但黎到又話怕沙，初時一直唔願意離開沙灘席。我喺附近玩沙，扮曬好開心咁，佢忍唔住先落黎跟住玩。仲記得有次又係專登搭的入黎玩，佢果時歲幾兩歲，又係唔肯落沙玩，終於出動到啜啜包，先氹到佢出黎玩⋯⋯呢啲回憶瀝瀝在目呀^^ 佢喺沙上玩左陣，玩到咁上下，我提議不如出去「筆」啲水返黎，佢又唔肯，話驚有貝殼⋯⋯嘻嘻，其實我都唔知佢驚貝殼啲乜，我就當係𠝹腳，不過小朋友想像力好豐富，我覺得佢驚嘅唔止係咁。 我來來回回「筆」左幾次，都覺得攰攰地，就再提議佢出去。佢一直堅持要我去，於是我索性坐喺席度同佢講：「我好攰啦，我出左去咁多次，不如輪到你啦！」「我唔出啦，一係你就企喺度玩多陣沙我地走啦。」跟住我就坐返喺度唔理佢啦。哈哈，好快佢就要求我陪佢出去，一出左去就玩跳浪、踩水水，肆意咁跑來跑去，咁玩法佢梗係唔想返上去。 喺網放相有矛盾，其實我仲想放好多上黎，但我又驚偷相，雖然我唔係名人，其實係nobody，但都驚驚地⋯⋯anyway, 小朋友玩得幾開心^^ 我冇同佢著泳衣之類，隨心啦～～～衫就同佢帶多套係真。 玩完之後小朋友真係好攰，此時要同佢沖身又係另一挑戰。10個有9個細路唔知點解好怕花灑之類嘅野。本身已經攰攰地，仲要冰水咁灑落黎，好彩都快快手沖完佢，再開支佢至愛力多畀佢，坐低靜靜地食幾塊餅仔又冇事啦。 之後我地又好好彩即刻上到班小巴，望住金黃色嘅夕陽返屋企，我真係好感恩！好開心！希望仔仔都會記得呢啲點滴啦^^

飲食 · 日常

兔兔肉醬意粉

martharitagoLeave a comment

返學都成個月了，小朋友都習慣返上午班，不過每朝起身都會掙扎一輪咁咯。 過左嘅暑假，我煮得最多畀佢食嘅就係肉醬意粉。因為有時我冇煮午餐，就會一齊去快餐店，點得最多嘅就係肉醬意粉。佢每次都食過返尋味，不過出面食得味精多始終唔係咁好，所以我會煮畀佢食。 平時我係煮普通意粉，即係spaghetti, 早幾日見到呢隻兔兔意粉好得意，小朋友一見到即刻攬住放喺心口話要食，見佢咁堅持就帶佢地返去啦。 意粉有三隻色，我估係正常味、甘筍味同青椒味，食綠色果隻時真係有少少椒味！肉醬意粉最易煮，難得小朋友鍾意，煮多幾次都仲得。煮肉醬意粉最緊要先加蒜粒落去炒，食落去香好多！今次仲加左洋蔥粒、蕃茄同切碎左嘅菇碎落去，加埋茄醬炒，就算小朋友唔食洋蔥同菇，咁樣撈埋食都唔覺，照食無誤（≧∇≦）。

kindergarten

小幫手

martharitagoLeave a comment

阿仔新嘅學年又開始了！ 我同佢轉左另一間幼稚園重讀K1。 呢間學校近過以前果間，唔駛搭車，而且仲係上午班，冇野比呢個更吸引！ 阿仔返學好開心。雖然佢同樣同以前一樣返學前都話唔返學，但接佢放學佢次次都開心笑，有一日佢仲同我講佢好鍾意返學。冇野比聽到呢個更安慰。 佢而家係超大仔了，我對佢嘅要求比起舊年會高少少，起碼我幫佢整左個時間表，就係要佢照住黎跟，希望可以養成好習慣。 圖文並茂，希望幫到佢。

童言無忌

叔叔？姨姨？

martharitagoLeave a comment

同阿仔去茶記食野，櫈未坐暖已經有位蓄短髮但身型瘦削嘅阿姐，好爽快咁走黎招呼我地。 一坐低抬頭望上去就見到佢咀上密麻麻嘅汗毛，唉，我已經心知不妙⋯⋯ 阿姐繼續好眉精眼企咁問我地食乜，我一邊揭餐牌，但其實個心好焦急咁諗緊名阿仔幾時出招。 話口未完，阿仔就講野啦。 阿姐﹕「點呀，兩位想食啲乜﹖」 仔﹕「媽咪，呢個係姨姨轉定叔叔呀？」 我：「兩個晚餐。。。。。。」 阿姐好似聽唔到咁完全冇反應！？ 仔：「佢係姨姨定叔叔呀？」 除左尷尬，我己經唔知點樣控制呢個場面，我望住坐我對面嘅老公，佢笑得好開心。我唯有採用鴕鳥政策，乜野都當聽唔到。 我﹕「之之呀，可唔可以靜啲呀？」 仔﹕「佢係叔叔定姨姨呀？」 我：「兩個晚餐，一個飯一個薯菜。。。。。。」 阿姐好似聽唔到咁，完坐冇反應，仲好快咁覆左次單就走左。 老公：「點解你可以唔笑？」 突然間我明白了，阿姐應該同我一樣，除左尷尬，佢仲可以點？唔通對住個客笑咩？ 之後SERVE我地嘅，都唔係呢個阿姐了。 好彩我地個晚餐冇特別加料姐。。。。。。