日本之旅﹕香港＞名古屋

 

好慘呀！辛辛苦苦打左篇野，搞條CAPTION搞搞下成篇野唔見左呀！

WORDPRESS愈黎愈難用，D野又唔USER FRIENDLY，手機版好多FUNCTION都冇左，最離譜係要逐張相UPLOAD上，what is going on!!?? 唉…

*** *** ***

話說前一晚我同老公鬼咁緊張，緊張都訓唔著覺呀！痴線呀，哈哈哈 ^0^

可能因為今次同兩個小朋友一齊去，一個仲要係BB，寧舍緊張！成日驚帶漏野，又驚遲起身，趕唔切飛機。我以為哥哥一樣咁緊張興奮，點知佢好乖，真係好早訓著左。同上次去首爾好唔同，佢呀臨出發之前果晚仲發緊燒，第二日周圍同佢搵醫生睇，佢退左燒我地即刻飛的趕飛機，趕死。

原以為一早準備好曬都會輕鬆D，唔知點解都係好鬼趕，早餐都要喺機場食。

終於搭到機場快線！以為佢會好興奮，點知佢又好平靜。可能佢內心好緊張，好驚漏左人。

喺香港站行李已寄倉，之後好輕鬆，終於有個心情食早餐。老豆買緊返黎，自拍下啦。

上機無耐話眼訓喎，哈哈，邊訓到丫~~知我影佢，突登咋咋啼。哈，呢張說明了哥哥真係大個了，佢以前唔會扮曬野咋咋啼架，而家識得俏皮作反啦。

哥哥有位坐，妹妹全程坐大脾。我地訂位時突登訂呢行，前面一大條通道，可放BB籃。我地去程時冇用到，返來時喺空姐insist下用左，妹妹而家9個月，剛剛好，再d大都訓唔落啦。

今次哥哥進步左，每次旅行佢最叻唔食野。喺我嚴厲警告下，佢勉為其難咁食曬成個肉醬意粉，算係咁啦。

yeah!!\\^0^//

坐左四個機鐘頭機，喺機長宣布下，調整手表做日本時間，哈哈，我地正式到達名古屋啦~~~

因為一家四口，就唔咁趕啦。第一日會喺名古屋抖一晚，第二日先出發往上高地。但一到步就明顯覺得好熱，比香港更熱！真係有d失望！我唔想成個trip都熱辣辣咁過呀！>.<

名古屋嘅中部國際機場，哇唔知係咪熱浪關係，機場熱到嘔！直情好似焗熱狗咁，其實一出左飛機，明顯感到熱辣辣，個個熱到濕曬……我塊面會出汗架。。。－＿－！！

老公份人好均真，每次旅行plan行程是一定的。佢仲會搵埋邊條路線坐邊架車，喺邊個月台幾點班次等等。事前我地喺youtube度睇到買musky嘅教學，去到實戰時又有少少唔同。一下子全部日文，流程等等又唔同，一個全新的user experience。用喺上黎荒荒張張的，好好笑。

「好緊張呀！入真錢呀，日文嘅﹖講咩呀﹖好驚買錯飛呀！」

yeah！成功買到飛啦！

落機兩點幾，日本時間三點幾，搞埋手續出到去都4點幾5點咯~~咁令嘅斜陽喺香港好少有。

musky係佢地嘅機場快線，喺名古屋火車 站落車後再轉去名古屋地鐵站，再轉去我地酒店嘅站﹕栄(ＳＡＫＡＥ）

對上一次黎日本係去北海道，都有成１０年時間喔！上次兩個大人去，今次一家四口，期待今次旅程，唔知會係點呢﹖

終於黎到名古屋啦！一出站就見到人來人往，好多隧道好多出口，我地幾仔那拎住兩個大喼又推住架B車，見到咁嘅畫面都暈暈地呀。

一下子都唔知應該邊個方向先啱。但同時間，我個心又蠢蠢欲動。。。地下街呀！係地下街呀！好想行曬佢呀！

可惜。。。係冇得行嘅（哭！）但真係好肚餓，唯有近近地求其搵Ｄ野食先啦！一屈尾就去左附近麵包店買包食。

等爸爸買包包，我地就企喺出面等。請小朋友做小幫手看行李，其實係唔想佢周圍走！

千辛萬苦終於返到酒店了。聽講今年熱浪沖擊日本，我地一出地鐵站，已感受到果種熱氣。

係熱到冇朋友，熱到放生雞蛋火喺地下煎得熟果隻，熱到抖唔到氣。我唯有同自己講，好彩唔係香港咁濕。。。

返到酒店第一件事開冷氣，咩都唔想做。小朋友唔同，佢地好快回氣，咩都想睇，咩都想試，咩都要搞，咩都要有佢份。。。

喺機場ＣＨＥＣＫ－ＩＮ時老公先發現對鞋爛爛地，所以要去買鞋咯～～我地酒店好近商場，但唔知點解，街上面水靜河飛，我仲以為呢度係商業區，星期日所以冇人﹖

行行下就見到佢啦！哇！好想去呀！我同自己講，冷靜Ｄ！最後果站我就黎探你啦～～～

誤打誤撞我地去左另一個商場，除左要搵平靚正嘅鞋，仲要搵野食。商場共七層，老公去左ＡＢＣ　Ｍａｒｔ買鞋，我過隔離睇。。。ｗｏｗ　心生羨慕呀！

係間手作店！入面賣好多手作工具，各式各樣嘅布呀、絲帶、。。。，整首飾用嘅膠模、ｕｖ膠、車衫用嘅木公仔。。。你諗到嘅都有。。。我真係好想帶曬佢地返香港。

店規模唔算大，但好齊全。

唔同樣式、唔同尺寸、唔同款嘅布都有咁多！

鍾意整手袋﹖喺度揀啦，布都唔駛自己裁。

揀埋絲帶去襯下啦！揀到傻呀。

有冇見到相頂有塊寫住「水玉」嘅牌﹖冇錯呀！淨係波點布都有成個櫃畀你慢慢揀。。。只嘆日本手作人太幸福啦！

除左買鞋，仲係黎搵野食。老公份人去法國都要搵中餐食，所以搵食呢件事都要搵ｄ熟口熟面嘅餐廳／菜色，否則佢會食唔飽－＿－！

雖然喺香港成日都可以食到日本野。但去到日本，食嘅野係差唔多，但論煮法、擺設等等又差天共地了。

食完野就出發去大須觀音寺睇夏祭。

去到大須觀音站時水靜河飛，我仲懷疑會唔會記錯時間。去到觀音寺原來已經開始左，周圍仲要人生人海。

所謂祭，係寺入面搭左個台，有人表演打鼓（太鼓﹖），間唔中又放下煙花咁。我睇返官網，我地睇嘅只係一細部分。

好熱鬧，人山人海！

小朋友最開心啦，騎住膊馬最舒適。佢老豆就慘咯～當日天氣又悶熱，人又多，佢又平均身高，企埋人群入面只係望住人嘅後兜，佢都唔知自己企喺度做乜，佢仲要咩住部相機。。。

我推住ｂｂ車，就唔湊熱鬧啦。ＢＢ真係可愛呀！嘈到拆天呀！
佢要訓就訓啦，放炮都嘈唔到佢呀！^_^

企埋一邊睇下人都好開心。祭除左表演，另一特色係好多攤檔擺出黎。食嘅玩嘅都有。日本人咁多祭，我覺得係因為日本人平時講究整齊乾淨，點會容忍到日日畀人擺大排檔﹖所以就趁呢ｄ時間出黎熱鬧下，例外一下。

見到呢ｄ攤，我覺得好似台灣墾丁咁。

除左擺檔，好多日本人都會著浴衣參與呢ｄ祭。一來天氣熱，著住浴衣就係一塊布捲住個身，如果質地好，真係會好通爽。

浴衣好有傳統感覺，我覺得就好似租韓服去景福宮咁。好羨慕佢地既可以傳統，亦加入現代原素，好有特色！

雖然而家大陸、台灣甚至東南亞玩著漢服都大行其道，不過始終流於ｃｏｓｐｌａｙ感覺。要入曬屋個個都著，就真係好難了。

過「祭」時，佢地真係著住浴衣出出入入，著住搭地鐵，著住推ｂ車，非常普遍。

睇完祭要打下卡先。

祭典完左，曲終人散。望向其中一條橫街，我就諗起首爾了。Ａ子，好掛住你呀！