原本只係想分享下做左本書仔，點知愈講愈感觸，跟住仲離曬題發表左大篇偉論⋯⋯慎讀。
小朋友就讀普通學劵幼稚園。
學校每星期都有兩堂Native English Teacher教英文，仲有jolly phonics學，見仔仔phonics都學得算唔錯，不過進度極度緩慢😅。同出面私幼肯定冇得比。
K2一開學，唔少家長已為仔女展開戰線，加操特訓，個個都係為左考小學。
原本我都好鬼緊張，聽人講話學Cambridge，我又去搵資料；跟住又話學phonics, 同佢完左坑口英文班，諗住屋企附近搵過間，點知拖到而家都冇影。跟住聽人講考個Trinity證書容易啲，叫做有張 cert咁。
考官津的，cert可用黎整令個profolio叩門用；考私小的更不在話下，小朋友個個都train到十項全能，西班牙普通話畫畫比賽攞獎攞cert一定要放入profolio，英文就更lark lark聲啦～～。
我想知道點解啲家長要搞到個個都細路十項全能咁，係咪同小學教學程度有關？
於是同老公特登去書局搵小學補充練習參考下。第一本就抽數學練習出黎，哇，我覺得似認生字多過真係計數⋯⋯。
文字題幾乎佔全版！我覺得就算計數叻都冇用，因為我連題目都未識睇！
我發現由k3上小一之間真係有好大個gap!其中一個最大gap就係詞彙量。
K3仲係唱遊堂玩玩下，點解小一會突然識咁多中文字呢？我終於明白點解人地話私幼谷，k1學寫字，但都大把父母推小朋友去讀。
小朋友能力高啲，父母自然輕鬆啲。小朋友做功課唔駛花太多時間，起碼執筆寫字唔會有難度。
但能力發展慢啲如細b，小手肌未好發達，要佢地坐定定專注已經係訓練；跟住要執筆控制大小手肌去寫好一個字，寫幾隻都ok嘅，但慢慢老師要你寫成版，又或者因為控制力唔好，寫啲字「咩」曬，所以要擦過寫過⋯⋯
佢地先3、4歲人仔，咁細個要面啲呢啲挫折感為咩呢？3、4歲時乜唔係日日玩，日日痴住父母無憂無慮過日子咩？
香港係和平社會，而家唔係打仗走難。小朋友最難受乜唔係同兄弟姊妹爭玩具、打下交之類咩？我明白父母擔心小學程度之深，不如早早訓練，好過將來適應唔到被淘汰，到時就後悔莫及追唔返了！
呢個真係一個迷思！「打好個底」其實係一個咩「底」？識字認字多嘅「底」？
入到小學又要應付功課，幼稚園學到extinguisher對小學學習有幾多幫助？
開學時連續發生多宗學生自殺悲劇。父母打算早早訓練為子女將來，冇而家點會有將來？
當現在被迫得透不過氣，大人都話可以轉工轉環境，小朋友面對迫你果個係父母，學校又唔轉得，年復年日復日過住啲唔開心嘅日子，試問，佢地覺得除左以死，尋求解決，仲有咩出路？
我唔講谷，因為太空泛。
究竟咁細個就接受抄寫背嘅訓練，我相信都係為名校，為學位。
我都讀過大學，身邊朋友個個都大學畢業生。個個條路都係咁走過黎，有邊個唔係話學啲野畀返曬老師？十個有九個讀書為考試，過左關就係神仙，上到岸就係叻仔。呢啲只求結果不問過程嘅價值觀，咪就係香港人咯！
上到小學啲功課程度深好多，我明白的確要同小朋友加強訓練。
而家囝囝仲寫緊「土」、「日」呢啲字，幾時先跳到去「家明有10個蘋果，他給了2個小玉，又給小康分了2個，現在他有多少個？」😨😨😨我完全唔知道小朋友喺邊度學呢啲字返黎⋯⋯
自己總結，如想小朋友小學適應得好一點，先要學會海量文字，包括中英文。因為要懂那些字才懂得解題呀！解了題才能做功課呀！？
我不知道能否讓小朋友一兩年吸收海量的文字，但我相信最快而最實用的途徑是閱讀。
我由之前用粵語給他說故事改為用手指指著每個生字讀起來，希望盡量多增加他的詞彙，就算不懂寫，起碼能認得那些字！
其次是會寫字。答文字數學題也要用中文寫出來呀！終於也給他買了些寫字練習，希望盡量讓他早點熟練揸筆的感覺和運用。
經過之前密集式「訪問」唔同補習社，發現其實各家都有自己一套方法訓練小朋友，重點當然係幫佢地買教材。
我覺得為了考小學就給小孩灌輸一些可能超越他能力範圍以外的知識，實在有點不智。
就似劍橋試，最基本的程度starters是由四、五歲開始，因此應試小朋友必須年滿四歲。
聽過不少人考小學前已經考到第二級movers程度。即是未到六歲，已經達到英國七、八歲小朋友的程度。
當然他們的家長都說自家孩子很喜歡才讓他報讀，不過四五歲人仔考到七八歲小朋友程度又如何呢？
除了可能幫助他入名校，能讓他繼續有優勢下去嗎？考到入名校，又能確保他將來前程似錦，搵工搵錢有保證嗎？
正如我自己，到了大學畢業的那一天，我還未搞清楚自己想要什麼，喜歡幹什麼，才是人生最大的遺憾，浪費了不少寶貴青春。
不過我也參考了Trinity最初級程度教材（聽說Trinity已經是最容易，因不用抄寫！），發現程度極淺，除非家長唔識英文，其實自己親自操刀都得！
就住會話內容，靈機一捉，趁住小朋友呢個「自戀」時期，對所有關於自己嘅野都有興趣嘅心理，加上佢而家最鍾意嘅屋企人，特登整左本書仔，學習一下最基本英語對話。
書仔過膠，仲可以叫佢喺書面寫自己個名，寫得唔好可以抹左佢再寫過，作為訓練。總好過寫copybook，淨係抄寫好悶嘅～～
內容好簡單，不外乎打招呼幾句。
阿仔對講野、表達自己唔係好有自信心。
加上叫佢用英文，佢真係有啲驚驚。搵本教材同佢對住練習，都驚佢會有上堂坐定定，壓迫的感覺。
而家圖畫全部係自己人，睇起上黎就有親切感好多啦😊😊❤️。
效果真係好好。
本書仔揭完又揭，平時抗拒講英文嘅佢，非常合作咁跟我每句講完一次又一次。
我講完佢又話要讀一次畀我聽，不斷重覆咁「玩」左好多次，又要扮老師講書仔畀我地聽，又要我地跟佢講⋯⋯
最後玩到ai我地畀佢講多次先肯熄燈訓覺⋯⋯難得佢對「英語」咁有興趣，我都老懷安慰，算冇白費心機！
五星級の家 My 5-stars Home 