手工時間：Tatting

做手工真係會上癮的！平時睇instagram見到好多人整左小手工，然後擺檔賣。初初整布花時我都有呢個念頭，不過見人地整得咁令，款色又咁多，我覺得真係好難同人比。

雖然係咁，我會幫自己打氣：各家有唔同做法，我練習多啲，參考多啲唔同款式，摸到自己喜好，為鐘意做而做，靚嘅自然有人欣賞。為開檔而刻意鑽研，未必成事呢😂！適合我呢啲懶人嘅方法。

做布花好地地都做得幾開心。不過好難搵到正宗和風布花嘅二羽重布料，轉左用絲帶黎做，香港又買到，都玩得好開心。其實唔經唔覺都做左唔少，多數喺instagram果邊發佈，冇更新部落格呢邊。

但我多數只做一朵花，未能湊合成製成品。自從妹妹出左世，真係少左時間同心思，想整靚靚頭帶畀佢，都只係做左新年版兩件，而家夏天版都冇，真心覺得有啲可惜。

布花頭飾未搞掂，又忍唔住跳入另一個坑——lace tatting.

原本冇諗過學，覺得好難。之前玩過crochet都織得唔好，唔係數錯行就鈎錯線，總之唔能夠正常地完成作品。後來在ig看見別家整得真的很美，那個像欖核的梭子又實在太可愛，於是又情不自禁走向另一深淵。

Lace tatting
Lace tatting分針編(needle tatting)同梭編(shuttle tatting)兩種。

喺祖國偉大嘅淘寶網搵齊架生後，就準備開始tatting啦💕💕。

一開始我係試shuttle的。上網搵啲tutorial跟人試，哇點知睇極都唔明，我連條線點穿都睇唔到，真係好大打擊😓，於是轉needle睇下點。

Needle比shuttle真係容易好多。做起上黎都有啲似鈎針嘅感覺。我係喺youtube搵左好多唔同嘅tutorial黎睇，最後先鎖定一位叫o.v.m嘅user黎學。跟住佢嘅tutorial慢慢做，做到少少成果出黎時真係好興奮！

之後我又死心不息再挑戰shuttle. 講真，連起針我都唔識，睇好多次，試好多次，死結、繩我都剪左唔少，慢慢先開始掌握到少少竅門⋯

目前為止，我仍然認為shuttle真係好難！挫敗感高時，我會轉針織，攞返啲趣味同成功感；然後又心思思會轉下shuttle, 雙軌進行。

做lace tatting大部分教學都係用梭子的，針真係好少。在書店買到的教學書都是shuttle,不過網上都有不少needle tatting教學及樣板分享，期望能夠再練習多啲，做啲成品出黎玩下☺️。